有人話:「發夢是孤獨的。」 因為夢中所有事物其實都係自己創造出嚟。但係當好多人都夢見同一個地方,咁㼈個地方就盛載住好多人嘅夢。你有冇諗過自己嘅夢,同其他人嘅夢可以重疊埋一齊?當你喺夢入面行去下一個街口,原來你已經進入咗其他人嘅夢中場景。
「灣仔大夢 22/23」 嘅概念就係同大家傾吓夢境,召喚每個人親身經歷的 「眞實」。人人嘅夢境都可以連埋一齊!於是我哋想收集大家嘅奇珍異夢,拼出一張大夢地圖。
由 2021 年 5 月開始收集夢境、同參加者以視覺形式重現夢境、一齊想像 「如果重新發呢一個夢,你喺夢中會點做?」,過程中發掘出好多唔同人嘅灣仔社區生活,討論亦觸及佢哋喺灣仔嘅記憶,同自身與灣仔嘅關係。 現在你可以另一個方式體驗以上過程, 地方雖然冇變,但體驗可以藉由我地重新理解而改變。親身出現喺現實與夢境交錯嘅場地,聽住造夢者描述佢哋嘅夢境,感受佢哋當時嘅情緒......你會聯想起啲咩?